An clásal coibhneasta díreach: focail agus frásaí eile
Úsáidtear na míreanna coibhneasta ‘a’, ‘nach’ agus ‘nár’ i ndiaidh focail agus frásaí áirithe. Ceisteanna atá i gcuid acu:
- Caidé a dhéanfaidh mé anois?
- Cé a chuir scairt orm?
- Cá mhéad a dhíol tú ar an charr úr?
- Cá fhad a bhí tú i do chónaí ansin?
- Cá huair a bheidh tú sa bhaile?
Coibhneas díreach a leanann focail ar nós ‘nuair’, ‘mar’ agus ‘minic’.
- Nuair a bhí mise óg.
- ‘An Tráigh Bheag’, mar a deir muid sa bhaile.
- Is minic a bhí cú mall sona.
Ní bhíonn béim ar an mhír choibhneasta ‘a’ sa chaint. Is ar éigean a bhíonn sí le cluinstin ar chor ar bith, i ndiaidh guta.
- Cé [a] bhí leat?
- Ba chuma caidé [a] déarfainn leis.